STILLING LEDIG:

Avisa Hordaland søkjer ansvarleg redaktør

Hordaland er heilt i toppen blant lokalaviser når det gjeld lesaroppslutnad, og auka inntekter gjev rom for satsing. Vil du vera med å ta endå større steg for Hordaland? Då er dette jobben for deg.

Publisert 02.02.2022 - 00:00 Sist oppdatert 02.02.2022 - 09:53

Denne artikkelen er over to år gammel.

Informasjon om stillinga:

Stillingstype: Fast

Arbeidsstad: Voss

Søknadsfrist: Snarest

Om arbeidsgivar

Hordaland er lokalavis for Voss, Granvin, Ulvik, Vaksdal, Modalen, Eidfjord og Ullensvang. Lokalavisa har lokale eigarar og samarbeider med Amedia om alt av tenester og system. Hordaland er opplagsvinnar blant lokalavisene i Vestland med eit opplag på 8334. Me veks kraftig digitalt, samstundes som at papiravisa står sterkt. Avisa kjem ut tre gonger i veka.

Lokalavisa Hordaland har teke store og viktige steg på kort tid. Me set lesarane i fyrste rekkje og har investert tungt i journalistikken. Me har modernisert drifta og innført nye robuste system frå Amedia. Hordaland-konsernet har vore med å starta nynorsk mediebyrå, og gjer samstundes ei betydeleg satsing på trykkeriet. Resultata er også gode, med kraftig vekst i talet på digitale abonnentar, samstundes som papiravisa held stand.

Leiaren i lokalavisa for Voss og bygdene omkring skal vera både ansvarleg redaktør og administrerande direktør. Me søkjer ein leiar som har ei klar forståing for korleis ei lokalavis må utviklast for å gje lesarane relevant innhald og berekraftig økonomi.

Målet er alltid å satsa på kjerneverksemda vår: styrkja journalistikken og vera ein attraktiv kommersiell partnar for lokalt næringsliv.

Om deg

Du har djup innsikt i kva innhald som engasjerer folk i Voss herad og i indre Hordaland
Du har djup samfunnsforståing og stor presseetisk innsikt
Du har redaksjonell erfaring og er ein pådrivar for endring og utvikling
Du er ein kulturbyggjar, du er systematisk og du kan dokumentera gode resultat
Du kan lesa ein rekneskap, du har evne til å prioritera og du våger å ta tøffe val
Du trivst i eit hektisk arbeidsmiljø og veit korleis du skal ta trygge avgjerder
Du har rolleforståing og tek ansvar, du trivst med å vera den som byggjer lag heller enn å vera stjerna på laget.